झापा, २ असाेज
मलद्वारमा लागूऔषध लुकाएर नेपाल तर्फ ल्याउने एक व्यक्तिलाई सशस्त्र प्रहरी बल, नेपालले पक्राउ गरेको छ ।
पक्राउ पर्नेमा कमल ५ बस्ने ४१ वर्षीय दिपेन राई रहेका छन् । आज बिहान ९.३० बजेतिर मेची पुल काँकडभिट्टामा सशस्त्र प्रहरी बल, नेपाल प्रस्तावित सीमा सुरक्षा गुल्म काँकडभिट्टाबाट परिचालन भएको जोजो नामको लागूऔषधसम्बन्धी तालिमप्राप्त कुकुर र कुकुर परिचालन गर्ने सशस्त्र प्रहरी बरिष्ठ हवल्दार सुमन भण्डारीसहितको ४ जनाको टोलीले १० ग्राम ब्राउनसुगरसहित राईलाई नियन्त्रणमा लिएको हो।
भारतबाट नेपालतर्फ आउँदै गरेका पैदलयात्री राईलाई शंका लागेर तालिमप्राप्त कुकुरद्वारा तलासी लिँदा उनले लागूऔषध मलद्वारमा लुकाई ल्याएको अवस्थामा फेला परेको थियो । उनलाई नियन्त्रणमा लिई आवश्यक कारवाहीको लागि इलाका प्रहरी कार्यालय काँकडभिट्टामा बुझाएको सशस्त्र प्रहरी बल, नेपाल नं. २ गणका सूचना अधिकारी एवं निमित्त गणपति सशस्त्र प्रहरी नायव उपरीक्षक सुमन पोख्रेलले जानकारी दिएका छन् ।
