झापा, फागुन २९
मोरङको विराटनगरमा रहेको तुलसी बहुुउद्धेश्यीय सहकारी संस्थाका तीन जना सञ्चालकलाई प्रहरीले पक्राउ गरेको छ । बचतकर्ताले जम्मा गरेको ठूलो रकम हिनामिना गरेपछि प्रहरीले उनीहरुलाई पक्राउ गरेको हो ।
पक्राउ पर्नेहरुमा संस्थाकी उपाध्यक्ष अनिता गौतम, सचिवका सविना न्यौपाने र क्षेत्रीय प्रबन्धकको रुपमा कार्यरत मन्दिप खवास रहेका छन् ।
२०५२ सालमा स्थापना भएको उक्त सहकारी विराटनगरको सबैभन्दा ठूलो सहकारी हो । तर, फागुन १ गते देखि सेयर सदस्यहरुलाई कुनै जानकारी नदिई कार्यालय बन्द गरी ठगी गरेको भन्दै सेयर सदस्यहरुले जाहेरी दिएपछि उनीहरुलाई जिल्ला प्रहरी कार्यालय मोरङले पक्राउ गरेको हो ।
संस्थाका अन्य ५ जनालाई प्रहरीले खोजतलास गरिरहेको जिल्ला प्रहरी कार्यालय मोरङले जनाएको छ । बचतकर्ताले संस्थाका ८ जनाविरुद्ध जाहेरी दिएका थिए ।
सहकारीका सञ्चालकहरु नै फरार भएपछि उनीहरुले फागुन २८ गते १२ करोड ९ लाख ४ हजार ४ सय ८७ रूपैया बराबरको रकम ठगी भएको भन्दै ८ जनाविरुद्ध उजुरी दिएका थिए ।
सोमबार विराटनगरमा पत्रकार सम्मेलन गरी जिल्ला प्रहरी कार्यालय मोरङका प्रमुख दीपक पोखरेलले उक्त सहकारीमा २१ हजार ७१३ सदस्य रहेको बताए । विराटनगरमा मात्र ४ हजार बढी सदस्य रहेको अनुसन्धानबाट खुलेको उनले जानकारी दिए ।
विराटनगरमा मुख्य कार्यालय भएको सकहारीले झापाको दमक, उदयपुरको गाईघाट र सिरहाको गोलबजारमा ३ वटा सेवा केन्द्रमार्फत कारोबार गरेको पनि प्रहरीले जनाएको छ ।
सहकारीको नाममा अर्बौंको सम्पत्ति र कारोबार
वि.सं. २०५२ साल चैत्र १३ गते सहकारी विभागमा दर्ता भएको तुलसी सहकारीको झापाको दमक, उदयपुरको गाईघाट र सिराहाको गोलबजारमा समेत सेवा केन्द्र छ। सहकारी विभागबाट प्राप्त विवरण अनुसार तुलसी सहकारीको दर्ता नम्बर ४१७-०५२/०५३ हो। सहकारीले विराटनगरका बचतकर्ताहरूबाट मात्रै करिब ६६ करोड रुपैयाँ निक्षेप संकलन गरेको बताइएको छ। अन्य सेवा कार्यालयको समेत हिसाब गर्ने हो भने सहकारीले हालसम्म जम्मा डेढ अर्ब बराबरको निक्षेप संकलन गरेको श्रोतको दाबी छ। अन्नपूर्णसँग सम्पर्कमा आएका कर्मचारीहरूका अनुसार सहकारीले हालसम्म ४८ करोड रुपैयाँ ऋण लगानी गरेको छ। सहकारीको शेयर पुँजी भने मात्र १० करोड रहेको छ।
तुलसी सहकारीको नाममा विराटनगर–१९ स्थित मिलनचोकमा १६ कठ्ठा जग्गा छ। झापाको गौरादहमा तुलसी राईस मिलको नाममा पनि डेढ बिगाहा जग्गा छ। गाईघाटको खाबुमा पनि सहकारीको नाममा ३०० रोपनी भन्दा बढी जग्गा रहेको कर्मचारीहरु बताउँछन्। कर्मचारीहरूका अनुसार दमक, गाईघाट र लेटाङमा समेत सहकारीले विभिन्न डिपार्टमेन्ट स्टोरहरू सञ्चालन गरिरहेको छ।
यद्यपि, सहकारीले पैसा फिर्ता गर्न नमान्नु आश्चर्यजनक विषय भएको बचतकर्ताहरू बताउँछन्। विराटनगर–११ निवासी विनोद कुमार भगत भन्छन्, ‘महिनादिन भन्दा बढी भइसक्यो। तर, आफैँले जम्मा गरेको पैसा फिर्ता पाइएन। मेरो साढे ३ लाख मात्र छ। तर, सहकारीले २/३ हजार रुपैयाँ पनि दिन मानेको छैनन्।’
विराटनगर–२ मुख्य कार्यालय रहेको तुलसी सहकारीका अध्यक्ष केदारनाथ शर्मा हुन्। सहकारीले काठमाडौंको गोठाटारमा गोर्खा टी एण्ड कफी उद्योगमा पनि लगानी गरेको बताइएको छ। यसबाहेक भक्तपुरको मध्यपुर ठिमीस्थित शिखर दीप बचत तथा ऋण सहकारी संस्था, शिव शिखर कृषि सहकारी, गोर्खा वेभरेज र शिखर फ्रुट एण्ड स्पाइसेस जस्ता उद्योगमा समेत तुलसीको लगानी रहेको जनाइएको छ।
