दमकबाट काठ तस्करीमा संलग्न पाँच जना पक्राउ

सेयर गर्नुहोस्

झापा, भदाै २२
जंगलबाट लुकाइ छिपाइ साइकलमा काठ ओसारपसार गर्दै गरेको अवस्थामा दमकमा पाँचजना पक्राउ परेका छन् ।
इलाका प्रहरी कार्यालय दमकले दमक २ बाट ५ जना पक्राउ गरेको हो । पक्राउ पर्नेहरूमा इलाम जिल्ला चुलाचुली– ५ का १९ वर्षीय नवीन लिम्बू , चुलाचुली– ३ का २० वर्षीय सुजन श्रेष्ठ, सोही ठाउँका ३० वर्षीय धनपति न्यौपाने, फाकफोकथुम– ३ का २० वर्षीय रमेश लिम्बु र पाँचथर तुममेवा– १ का २२ वर्षीय विवेक लिम्बू रहेको प्रहरी कार्यालय झापाका प्रहरी निरीक्षक कैलाश अधिकारीले जानकारी दिनुभयो ।
इलाका प्रहरी कार्यालय दमकबाट खटिएको प्रहरी टोलीले उनीहरूलाई बुधबार बिहान ३ बजे दमक नगरपालिका– २ स्थित आम्दा रोडबाट अवैध काठसहित पक्राउ गरेको हो । उनीहरूको साथबाट सिसौको जातको गोलिया ५ थान २६.८५ क्युवि र सखुवा जातको चिरान काठ १४ थान ११.९५ क्युवि गरी जम्मा ३८.८० क्युवि काठ र काठ काट्ने औजार समेत फेला परेको प्रहरी निरीक्षक अधिकारीले बताउनुभयो । बरामद गरिएको काठसहित पाँचैजनालाई आवश्यक कारवाहीका लागि सब डिभिजन वन कार्यालय बेलडाँगी दमकमा बुझाइसकेको प्रहरीले जनाएको छ ।