प्रदेश १ मा एकै दिन ३ महिलाकाे रहस्यमयी मृत्यु

सेयर गर्नुहोस्

झापा, असार २८
प्रदेश १ मा एकै दिन तीन जना महिला मृत भेटिएका छन् । झापा, मोरङ र इलाममा गरी तीन जना मृत भेटिएका हुन् । प्रहरीका अनुसार झापाको विर्तामोड नगरपालिका– ५ की २६ वर्षीया सृजना बस्नेत, मोरङको सुन्दरहरैँचा नगरपालिका–७ की २४ वर्षीया छेविनी ऋषिदेव र उच्च अदालत विराटनगर इलाम इजलासमा कार्यरत ४८ वर्षीया विमला पराजुली मृत भेटिएका हुन् ।

तीन जनाको मृत्यु शंकास्पद छ । मोरङकी २४ वर्षीय ऋषिदेव घर नजिकैको गछिया खोलामा  अर्धनग्न अवस्थामा फेला परेकी हुन् । झापा विर्तामोडकी २६ वर्षीय बस्नेत पनि डेरा अगाडिको सडकमा अर्धनग्न अवस्थामा फेला परेकी हुन् ।

४८ वर्षीय पराजुलीको शव कार्यालय परिसरमा घोप्टो परेको अवस्थामा प्रहरीले फेला पारेको थियो । सोमबार गछिया खोलामा ऋषिदेवको शव देखेपछि स्थानीयले प्रहरीलाई खबर गरेका थिए । इलाका प्रहरी कार्यालय बेलबारीका प्रहरी निरीक्षक सरोज खनाल नेतृत्वको टोलीले खोलाबीचको भङ्गालोमा घोप्टो परेको अवस्थामा शव फेला पारेको थियो । 

महिलाको कम्मरमुनिको भाग कपडाविहीन थियो । कम्मरमाथि पनि भित्री वस्त्र मात्रै रहेको अवस्थामा शव भेटिएको मोरङ प्रहरी प्रमुख एसपी जनार्दन जिसीले बताए ।

 घटना शङ्कास्पद देखिएपछि शव पोष्टमार्टमका लागि विपी कोइराला स्वास्थ्य विज्ञान प्रतिष्ठान धरान पठाएको प्रहरीले मृतकका श्रीमान २६ वर्षीय मन्जे ऋषिदेवलाई पक्राउ गरेको उनले बताए ।

 प्रहरीका अनुसार आइतबारसाँझ श्रीमान–श्रीमतीबीच सामान्य भनाभन भएको प्रारम्भिक अनुसन्धानबाट खुलेको छ । मृत फेला परेकी छेविनीको शरीरमा बाहिरी चोटपटक भने नदेखिएको प्रहरीले जनाएको छ ।

 झापाको बिर्तामोड नगरपालिका–५ मा आज (सोमबार) बिहान २६ वर्षीया बस्नेतको शव फेला परेको झापा प्रहरीका प्रवक्ता डिएसपी राकेश थापाले बताए । सानीआमासँग डेरा बस्दै आएकी उनको शव डेरा अगाडिको बाटोमा अर्धनग्न अवस्थामा फेला परेको  हो ।

प्रहरीका अनुसार मृतकको शरिरमा निलडाम देखिएको छ । घटना शङ्कास्पद भएकाले अनुसन्धान सुरु गरेको उनले बताए । घटनाको अनुसन्धानका लागि प्रहरीले तालिमप्राप्त कुकुर परिचालन गरेको छ ।
 
उच्च अदालत विराटनगरको इलाम इजलास परिसरभित्र कार्यालय सहयोगी पराजुली मृत भेटिएकी हुन् । सोलुखुम्बु घर भएकी ४८ वर्षीय पराजुलीको शव कार्यालय परिसरभित्र घोप्टो परेको अवस्थामा भेटिएको प्रहरीले बताएको छ । प्रहरीका अनुसार घोप्टो परेको अवस्थामा भेटिएको शवमा बाहिरी चोटपटक देखिएको छैन ।